Tydens ‘n onlangse episode van Stroom Stories het Christie Saayman, die hoof van Abraham Kriel Potchefstroom, ‘n indiepte gesprek gevoer oor die uitdagings en verwikkelinge waarmee die kinderhuis tans te kampe het. Die ontmoeting was egter nie die vreugdevolle reünie waarop gehoop is nie, aangesien die kinderhuis tans in ‘n ernstige finansiële verknorsing verkeer weens die nie-betaling van hul subsidie deur die staat. "Ons het laas op 21 Desember 2023 subsidie ontvang vir die tydperk Desember 2023 tot Maart 2024".
Die Abraham Kriel Kinderhuis versorg tans 230 kinders wat vanuit verskeie dele van die Noordwes-provinsie afkomstig is. Hierdie kinders is na die kinderhuis verwys, omdat daar vir hulle geen ander heenkome is nie. Die prosedure begin wanneer ‘n maatskaplike werker bevind dat ‘n kind in gevaar verkeer. Hierdie werkers het die reg om die kind te verwyder en indien daar geen ander plek vir die kind is nie, word hulle uiteindelik in die kinderhuis geplaas deur ‘n hofbevel. Alhoewel die kinderhuis steeds die keuse het of hulle die kind wil aanneem of nie, word daar streng keuring toegepas om te verseker dat elke kind se welstand in ag geneem word.
Die Uitdagings van Omsien na 230 Kinders
Alhoewel die kinders soms, soos enige ander, klein huislike kwessies ervaar, is dissipline min of meer onder beheer by Abraham Kriel. Dit is egter nie die grootste uitdaging nie – finansiële druk is. Christie verduidelik: "NPO’s sê altyd ‘ons het nie geld nie’, maar hierdie keer het ons régtig nie geld nie." Sedert Desember 2023 het die kinderhuis geen verdere subsidie van die staat ontvang nie, en hulle moet staatmaak op fondsinsamelingsgeleenthede soos die Liggiefees en ander inisiatiewe om hul deure oop te hou.
Christie het met kommer bygevoeg: “As ons nie binne twee weke reuse fondse inkry nie, weet ons nie mooi waar die geld vandaan gaan kom nie.” Dit kos die kinderhuis ‘n verbysterende R60 000 per dag om te funksioneer, en sonder bykomende hulp sal hulle sukkel om voort te gaan.
Hoe kan jy ‘n verskil maak?
Die gemeenskap word aangemoedig om ‘n bydrae te maak – of dit nou finansieel of in die vorm van vrywillige dienste is. Christie sê: “Ons kinders sal nooit honger gaan slaap nie,” maar om aan al hul behoeftes te voldoen, benodig die huis ondersteuning. Finansiële hulp is tans ‘n groot behoefte, aangesien kinders se versorging, onderwys, en voeding voortdurend gefinansier moet word.
Daar is ook ‘n behoefte aan vrywilligers om kinders te help met sport, studietyd, Bybelstudie, en selfs kombuis- of administratiewe take. Fisiese bydraes soos blikkies kos is ook altyd welkom. Die beste sal wees om die kinderhuis direk te kontak of hulle te besoek.
Telefoon: 018 294 5347
E-pos: hoof@akpotch.co.za
Sosiale media: Facebook
Adres: H/v Kruis en Viljoen Straat
Langtermyn Drome en Doelwitte
Ondanks hierdie uitdagings, bly die Abraham Kriel Kinderhuis hoopvol oor hul toekoms. Hulle droom daarvan om kleiner, meer huislike omgewings vir kinders te skep eerder as die huidige koshuisopset, wat tans 25 kinders per opset huisves. Dit is ‘n duur droom, maar een waarvoor hulle hard werk.
Die kinderhuis maak ook ‘n verskil in die gemeenskap deur projekte soos besoeke aan P.A.W.S en parkies wat hulle help skoonmaak. Hul betrokkenheid by die gemeenskap strek verder as net hul eie mure, wat wys hoe belangrik dit vir hulle is om terug te gee.
Suksesverhale en Hoop
Te midde van hierdie uitdagings het die kinderhuis ook suksesverhale om te deel. Een van hul kinders het in Matriek sewe onderskeidings behaal en studeer nou boekhouding. Daar is ook stories van vorige kinders van die kinderhuis wat nou gelukkig getroud is en gesinne het, wat bewys dat die huis ‘n groot invloed op hul lewens gehad het.
Abraham Kriel Kinderhuis is nie alleen in hul finansiële stryd nie. Baie ander nie-winsgewende organisasies ervaar dieselfde uitdagings. Soos Christie gesê het: “Ons is besig om te bloei,” en dit is ‘n noodroep vir hulp wat nie geïgnoreer kan word nie.
In hierdie tyd van finansiële onsekerheid, hoop die Abraham Kriel Kinderhuis dat hul gemeenskap sal saamstaan om ‘n verskil in die lewens van hierdie kinders te maak. En elke klein bydrae bring hulle nader aan hul drome vir ‘n beter toekoms vir die kinders in hul sorg.
Johané van Dyk - Potchefstroom
___________________________________
Gaan kyk na die episode van Stroom Stories hier:
.jpeg)
