“Ek wil hê julle moet drome hê wat groter en groter word en altyd aanhou, want dit is tog wat ons aan die gang hou as mense.”
Die kinderboekskrywer en laerskoolonderwyser, De Wet Hugo, werk al vir byna 15 jaar in die buiteland waar hy sy rol as Engelse onderwyser vervul, maar kom jaarliks terug na waar Dawid die wortels begrawe het. Hy is juis besig met sy Suid-Afrikaanse boektoer voordat hy na Europa reis vir ‘n welverdiende blaaskans. Die gewilde Grilgrypers-, Kies-jou-avontuur- en Kinkels en keuses-reekse het almal uit sy pen gekom en dit is’n treffer onder die jonger generasie.
So kort oorsig
De Wet Hugo is in Worcester gebore. Hy het drie ouer susters en het grootgeword op 'n Bolandse wynplaas tussen Worcester en Villiersdorp. In 2010 het De Wet die kans gekry om na Djedda, Saoedi-Arabië te verhuis, waar hy twaalf jaar as laerskoolonderwyser by 'n Britse Internasionale Skool gewerk het. Hy woon tans in Hangzhou, China, waar hy Engels onderrig by die gesogte Wellington College. De Wet is 'n ywerige leser en beskou Stephen King, Roald Dahl en Jacqueline Wilson as van sy gunstelingskrywers. Tydens sy besoek aan Laerskool Baillie Park, het ons hom beter leer ken.
‘n Kleurvolle agtergrond
De Wet het vir twaalf jaar in Saoedi-Arabië gewoon en nou in China, en oral waar hy kom, selfs ook tydens vakansiereise, ontmoet hy mense en bevind hy homself in situasies wat hy later dan in sy stories gebruik.
Sy boek, Die dertiende dag in Chengdu, wat vanjaar op die kortlys van LAPA-uitgewers se Jeugromankompetisie was en in Augustus 2025 sal verskyn, speel in China af en bevat elemente van Chinese mitologie. Van die karakters in daardie boek is wel geïnspireer deur mense wat hy in China teëgekom het.
Inspirasie kan enige plek gevind word
“Ek is 'n deeglike beplanner. Ek beplan en plot elke hoofstuk in redelike detail voor ek begin skryf. Ek hou egter nie altyd daarby nie, want soos die storie ontwikkel, kom klop ander beter of lekkerder idees dikwels aan. My inspirasie word geput uit alledaagse dinge rondom my. Ek vind dit nie uitdagend om kinderboeke te skryf nie, want my natuurlike skrywerstem is (met geluk) geskik vir kinders. Ek sou dit wel baie uitdagend vind om 'n volwasse roman of 'n nie-fiksie boek te skryf.” De Wet is 'n avontuurlustige persoon en reis gereeld saam met vriende of kollegas in en om China. Of dit nou 'n uitstappie na Hong Kong Disneyland toe is of 'n skooltoer na Dunhuang, China se woestynstreek, naby aan Mongolië is, De Wet pak elke avontuur met geesdrif aan.
Die reaksie en terugvoer vanaf sy jong gehore
“Wanneer ek by skole gaan kuier met 'n skrywersbesoek, reageer die kinders met groot opgewondenheid. Ek is dankbaar dat ons altyd baie boeke verkoop, want as onderwyser wil ek natuurlik graag hê ons moet 'n nasie van lesers bou. Ek dink maar aan die tipiese kind vir wie ek skoolhou wanneer ek 'n storie beplan. Kinders regoor die wêreld reageer dieselfde. Hulle raak opgewonde en bang vir dieselfde goed. Kinders is maar net kinders, ongeag wat hulle ras, geloof of kultuur is.” Tot op hede, het De Wet al in vier lande skoolgehou en in internasionale skole met kinders vanuit al die kontinente gewerk.
Wat het jou inspireer om 'n kinderboekskrywer te word en hoe het jou ervaring as 'n Suid-Afrikaner wat in China woon, jou perspektief as skrywer gevorm?
As laerskoolonderwyser wat toegang tot wonderlike kinderboeke in die klaskamer gehad het, was dit 'n baie normale keuse vir De Wet om vir kinders te skryf. Hy is lief vir kinders en wil hulle graag laat lees, want hy weet hoe goed dit vir hulle is. Chinese kinders lees baie graag en hulle ouers bestee graag geld aan nuwe boeke. Een van sy groot wense is dat ons Suid-Afrikaners ook so 'n gesonde leeskultuur sal kan aanleer of kweek. Laerskool Baillie Park se Biblioteek is Juffrou Madelaine Zerwick se trots en is ‘n kleurvolle, ligte spasie waar leerders aangemoedig word om soveel as moontlik te lees.
“Jy praat nie van ‘n koek terwyl hy nog in die oond is nie”
Toe die vraag sy verskyning maak, “is daar nuwe boeke of projekte waaraan jy werk”, het De Wet glimlaggend geantwoord “ek werk tans aan 'n hele paar projekte, maar soos my uitgewer een keer gesê het: "Jy praat nie van 'n koek terwyl hy nog die oond is nie." Hy meen dat dit veiliger sal wees om daaroor te gesels wanneer hy weet dat dít wat hy beplan, besig om te werk en dat dit heel moontlik die lig sal sien. Hy het opgewonde met ons gedeel dat daar drie manuskripte van hom by sy uitgewers lê en hy hoop om hulle deur die loop van 2025 as boeke te sien.
Advies en insigte
De Wet se advies aan aspirant kinderboekskrywers is die volgende: Moet kinders nooit onderskat nie. Hulle is baie slim. Kinders weet dadelik as ons vir hulle probeer preek of lesse by stories probeer inwerk. Skryf net lekker vermaaklike stories en as daar dalk 'n belangrike boodskap inglip, is dit 'n bonus. Moet ook nie in eenvoudige taal probeer skryf nie. Skryf soos ons praat. Weereens, kinders moenie onderskat word nie.
Hoe balanseer jy om getrou aan jou Suid-Afrikaanse wortels te bly terwyl jy jou ervarings in China in jou werk omhels en integreer?
"Ek gesels elke dag met familie en vriende in Afrikaans op sosiale media en met stemnotas, so my Afrikaans word gelukkig nooit afgeskeep nie. Ek lees ook so veel as wat ek kan in Afrikaans en luister graag na Afrikaanse musiek van sangers en groepe soos Laurika Rauch en Die Heuwels Fantasties."
Met agttien boektitels agter sy naam en twee ATKV Woordveertjies wat hy ontvang het vir Die Geheim van die Spookwerf en Die Holderstebolder Hondepartytjie, is De Wet se passie vir lees aansteeklik. Ons sien uit om nog lekker leesstof uit De Wet Hugo se pen te lees. Volg hom gerus op Instagram onder die naam de_wet_hugo of besoek sy webwerf om meer oor hom en sy werk te lees.
Johané van Dyk - Potchefstroom
________________________________
So paar foto's