Sy dra nie net die hoed van kranige netbalspeler nie, maar ook dié van stigter, afrigter én organiseerder by die Potchefstroom Panthers Netbalklub - maar Heleen Humpel verruil haar besige skedule vir niks.
'n Kort oorsig
Nadat die voormalige Potch Dorp Netbalklub ten gronde gegaan het, het oorlede netbal legende, Joey Schoeman, die Eagles Netbalklub gestig waar enige provinsiale speler, wie nie by die universiteit studeer of klaar studeer het nie, kon aansluit. Ongelukkig het die Eagles Netbalklub ook ‘n stille dood gesterf as gevolg van Joey se gesondheid wat afgeneem het. ‘n Paar jaar later is Panthers Netbalklub gestig en vul hul steeds vandag die leemte waar seniors spelers netbal kan speel op ‘n kompeterende én sosiale vlak.
Ontwikkeling en groei
Wat begin het met 14 spelers, net-net genoeg beffies en ‘n paar netbalballe, het gegroei tot ‘n klub van 60+ spelers wat wissel van hoërskool spelers, 'high performance' provinsiale en nasionale spelers asook spelers wat op klubvlak speel. Die klub het nie net in getalle gegroei nie, maar in elke opsig van die woord; soveel so dat hul vandag verskeie geleenthede vir oud en jonk aanbied om by die sport betroke te raak. Hierdie geleenthede en kursusse sluit in, maar is nie beperk tot die volgende: skeidsregter, afrigting, tegniese beampte, spanbestuurders en uitvoerende komitee lede.
Spanne en afrigting
Die spanne by die Panthers is nie vasgestelde spanne nie en hul hou deurentyd proewe voor elke toernooi. “Dit sorg vir gesonde kompetisie en verhoed dat cliques vorm. Op hierdie wyse word spelers ook gemotiveer om aan hul tegnieke te werk en sodoende die spanmaat bo jou uit te speel”, vertel Heleen. Die spanne wissel gereeld en spelers wat skaars derde span aan die begin van die seisoen gehaal het, draf ses maande later vir die eerste span op die baan. Daar is baie detail en tegnieke waarvan die bestuur gebruik maak tydens ‘n keuringsproses, onderandere statistieke, video opnames, analises en 'n paar "geheime Panther metodes”. Spelers se tegnieke en metodes word gedurig ‘getoets’ en dopgehou, veral wanneer dit proewe is. Die sisteem is beproef en getoets, uniek en absoluut eie aan die Panthers.
Dis 'n spanpoging
Sy (Heleen) is die hoofafrigter en is verantwoordelik vir die oefenprogram. Gelukkig hoef sy nie hierdie bielie van ‘n projek op haar eie aan te pak nie, sy is gelukkig genoeg om hulpafrigters te hê vir wie sy ook as mentor dien. Op só ‘n wyse kry die hulpafrigters 'n geleentheid om praktiese ervaring op te doen en ander afrigtingsaspekte te leer soos kombinasie samestelling en ook hoe om probleme op die baan en tussen die spelers op te los. Haar hulpafrigters is almal gekwalifiseerd (met die minimum kwalifikasie as Vlak 1 NSA). ‘n Passie vir die sport is ook beslis een van die vereistes van hierdie klub.
Oefening en programme
Die spanne is weekliks in die gimnasium, twee sessies op die baan en die doelskieters het weekliks aparte oefensessies en statistieke waardeur hul werk. Soms het hulle addisionele ‘high performance’ sessies vir die elite spelers of spesifieke spanne wat regmaak vir ‘n toernooi.
2024 Oefenkampe
Die Panthers het ‘n lekker bedrywige seisoen wat voorlê met verskeie oefenkampe wat hulle aanbied en vanjaar is die fokus op skoliere. Dit is 'n kombinasie van ‘tradisionele’ kamp (groot slaapsale en kamppret) en innoverende netbal tegnieke en oefenmetodes. Tydens hierdie kampe deel Heleen en haar span presies hoe die Panthers se statistiek metodes werk met die skoolspanne se afrigters. “Ons het 'n massiewe passie om die volgende generasies van spelers te ontwikkel en hul tot op senior vlak netbal te kan vat. Ons wil groei aan ons toekomstige Panthers lede en potensiële Proteas ontgin”. Basies, van die grasbaan tot by die nasionale baan.
Uitdagings en prestasies
Een van die grootste uitdagings wat die klub steeds beleef, is om ‘n permanente huis te kry waar hulle kan oefen. HTS Potchefstroom dien al vir ‘n hele paar jaar as die Panthers se tuiste, maar dit is wel ‘n droom en doelwit om eendag hul eie fasiliteite en klubhuis te hê - met al die bells and whistles. Die lidmaatskapfooie was ook vir ‘n lang ruk die enigste fondse wat die klub gekry het, maar het intussen massiewe ondersteuning gekry van Christie Louwrens en sy span by EB’s Hardware wat hul borg - die EB’s span sorg dat die Panthers alles nodig het om te presteer en is sekerlik van hul grootste ondersteuners.
Panther trots
Die Panthers spog ook met senior spelers wat op nasionale vlak by die Spar Nationals deelneem en skoliere wat provinsiale en SA spelers is. Verder spog die klub met ‘n Protea speler wat Panthers haar tuisklub genoem het voordat sy die wêreldverhoog betree het. Dit is nie nét die spelers wat hul vaardighede wys nie en daar was ook 'n paar Panthers wat op die beampte bank gesit het tydens die 2023 Netbal Wêreldbeker. Die klub het soveel hoogtepunte die afgelope twaalf jaar bereik in verskeie toernooie soos die Platteland reeks, wat in 2016 deur Heleen gestig is, die Dr Kenneth Kaunda Distrik Liga, die 7’s Festival toernooi en verskeie aksienetbal toernooie. “My emmer is vol vrugte wat al gepluk is as gevolg van die harde werk wat ons insit”, het Heleen trots vertel.
Gemeenskapsbetrokkenheid en -ondersteuning
Afgesien van die netbalklinieke en oefenkampe wat hulle aanbied vir skoliere, is hulle ook betrokke by die NWU Potchefstroom Kampus se koshuisligas waar verskeie Panthers hul talente wys - as afrigters én spelers. Sommige van die Panthers is ook permanente afrigters by skole in beide Potchefstroom en Klerksdorp. Dit is die klub se doel om so veel as moontlik terug te ploeg in die gemeenskap. “Ons probeer oral ons kennis deel met die volgende generasie en ons aansteeklike liefde vir die sport aan almal ten toon stel.” PAWS is een van hul gunsteling liefdadigheidsorganisasies en hul probeer gereeld betrokke te wees; die klub praat met groot lof oor Darren en sy span.
Intern het Heleen 'n ongelooflike ondersteuningsnetwerk in die klub; van spelers wat hul hand opsteek vir projekte tot ouers wat as spanbestuurders dien. In die gemeenskap het die klub massiewe ondersteuning van mense wat aanhou om die woord te versprei en gereeld vir hulle spelers werf. Hulle hoofborg, EB’s Hardware, tesame met HPS, Coco’s Saloon, Psycho Skull Supplements en Sunbake is die klub se grootste ondersteuners en aanhangers.
Kompetisies en toernooie
Met ‘n honger en gretigheid vir die volgende wedstryd, neem die Panthers aan omtrent enige toernooi deel. Die klub is geregistreer en geaffilieer via die Dr Kenneth Kaunda Distrik by Netbal Suid-Afrika as senior klub en kan daarom deelneem aan die Dr Kenneth Kaunda League, Fast5 League en die Twizza Club Challenge. Die klub neem ook graag deel aan die 7’s Festival wat in Klerksdorp aangebied word en die Panthers het die afgelope twee jaar as toernooi wenners daar weggestap. Die klub speel ook gasheer vir die Platteland Reeks en Panthers Aksie Netbal Liga; laasgenoemde word twee keer ‘n jaar op tuisbodem aangebied. “Ons het tans ons oog op drie groot toernooie waar ons wil deurbreek om ons spelers nog meer geleentheid te gee om te speel en ook om SA kleure te verwerf”, vertel Heleen met groot opwinding.
Missie en visie
Met die jaar en netbalseisoen wat afgeskop het, is die Panthers se korttermyn doelwit op hierdie stadium om net die fiksheid sessies te oorleef. “Daar is ‘n paar Panthers wat maar swaar trek”, het Heleen laggend genoem. Sy het nie ‘n woord gerep oor haar langtermyn doelwitte nie, maar wel vlugtig genoem dat sy haar visier op so paar geleenthede het.
‘n Eenvoudige uitnodiging
“Ons is eintlik 'n sosiale groep met 'n groot netbal probleem. As jy dieselfde probleem het, sal jy by ons inpas.” Die Panthers Netbalklub is meer as net ‘n span, hulle is hartsmense en ondersteun mekaar, hetsy op die baan of elders. Hulle bied hulp aan waar nodig, motiveer mekaar en verwelkom enige nuwe, voornemende speler met ope arms. Hulle het ‘n sê-ding, “Help 'n Panther” en hulle doen dit beslis! Die boodskap en uitnodiging is heel eenvoudig - kom net! Daar is ‘n plek vir jou, jou passie en jou talente; dit hoef nie noodwendig net as speler te wees nie.
Die toekoms van klubnetbal
Volgens Heleen is netbalklubs die toekoms vir Suid-Afrikaanse netbal. Sy is verder van mening dat klubs meer blootstelling kan gee aan spelers van ‘n jong ouderdom af en hul kondisioneer vir senior netbal op nasionale én internasionale vlak. “Afrigters by klubs is ook meer gespesialiseerd en kan jong spelers vroeg begin identifiseer en slyp vir professionele netbal.”
Hierdie klub speel vir hulle sport, vir mekaar en vir die Panthers. Die toekoms vir die Panthers is pienk en Heleen Humpel wil deel wees van hierdie klub so lank as moontlik. Klik op die logo hieronder om na die Panthers Netbalklub se Facebook blad herlei te word.
Johané van Dyk - Potchefstroom