In ‘n gebaar van samehorigheid en omgee, het ‘n plaaslike restaurant in Potchefstroom bygedra tot ‘n paartjie se mooiste dag. Op Dinsdag, 13 Augustus, het EveryDay Diner ‘n doodeenvoudige dag omskep in ‘n geleentheid wat hulle nie sommer sal vergeet nie. Na hulle amptelike ‘seremonie’ het George en Nella Cockram gedink hulle gaan iets gaan drink saam met so paar familielede om hulle huwelik te vier, maar groot was hul verbasing toe hul by die restaurant instap en pragtige, pienk versierde tafels sien.
'n Druppel in die emmer
Die mooi gedekte tafels was net ‘n druppel in die emmer van wat die oggend alles sou oplewer. Tannie Petro Zaayman, ‘n familievriendin, het die dag vir hulle gereël saam met die bestuurder van EveryDay Diner, Hyla Alberts. Dit was ‘n hele span poging en Hyla en haar span het die versierings gratis geleen by Lifestyle Centre en die heerlike sjokolade troukoek is gemaak deur ‘n vriendin van tannie Petro, Salomie Gericke. Tannie Petro het ook as die seremoniemeester gedien en ‘n seën oor die egpaar uitgespreek voordat hul die tafelgebed gedoen het.
'n Oggend vol pret, plesier en pragtige herinneringe
Dit was ‘n oggend vol pret, plesier en pragtige herinnieringe. Die klein, intieme seremonie het die bruidspaar soos ‘n handskoen gepas en hulle sou dit met niemand anders wou deel nie. ‘n Spesiale dank gaan uit aan Hyla van EveryDay Diner wat hierdie dag so spesiaal gemaak het, asook aan Lien Klokow van Lien Klokow Photography. ‘n Laaste dankie gaan ook aan Jessica wat hierdie dag se verrigtinge vasgevang het; Jessica is tans ‘n fotografie student en het al vroeg-vroeg die paartjie se seremonie afgeneem.
Hierdie spesiale geleentheid is ‘n getuienis van die omgee-harte wat in ons dorp is. Wat ‘n wonderlike voorreg om ‘n paartjie se dag onvergeetlik te maak.
Johané van Dyk - Potchefstroom
__________________________________
So paar foto's van die spesiale oggend