Op Vrydag, 13 September, het Laerskool M.L. Fick hande gevat met plaaslike besighede en skole in die dorp om ‘n vyfde, fantastiese gholfdag aan te bied by die Potchefstroom Buiteklub.
Borge verbaas jaar na jaar
Die gholfdag het as jaarlikse fondsinsameling vir die skool gedien en ten spyte van die wind, was dit ‘n suksesvolle dag op die baan. Meneer Divan Visser, Adjunkhoof van Laerskool M.L. Fick, het genoem dat vandat die gholfdag vyf jaar gelede begin het, het hul nog elke jaar agtien volgebordge gaatjies gesien. Verder het hy verduidelik dat die fondse gaan vir leerders wat uitsonderlike prestasies behaal het, maar wie se ouers dalk nie die finansies het om hul op ‘n toer te stuur nie; so die fondse word net so teruggeploeg in die leerders van M.L. Fick. “Dit is beslis die beste gholfdag van die jaar”, het Meneer Visser genoem.
'n Dag van netwerk en verhoudings bou
Die dag het ook as wonderlike bemarkingsgeleentheid gedien en plaaslike besighede soos Pro-Angling, The Broken Pot en Executive Real Estate het uitgestaan met hul helder stalletjies. By sommige stalletjies kon die spelers ‘n knertsie geniet voor hul afslaan en by ander het hul die geleentheid gekry om in te skryf vir ‘n geluktrekking. Hoër Volkskool en Potchefstroom Gimnasium het ook die dag bygewoon. Laasgenoemde hoërskool is ook al van die begin af betrokke by hierdie jaarlikse gholfdag.
Almal is 'n wenner
Meneer Michael Pietersen het ook genoem dat daar hierdie jaar 33 vierbal spanne ingeskryf het, wat op sig self reeds boekdele spreek van die gemeenskap se gewilligheid om betrokke te raak, nie net by die skool nie, maar ook die groter doel agter die gholfdag. Kekkel en Kraai, Laerskool M.L. Fick se kleuterskool, maak elke jaar die welkom-geskenkies en elke liewe speler stap op die einde van die dag weg met ‘n prys; of jy nou met negentien houe onder baansyfer geëindig het of heel laaste gekom het.
“Ons as Laerskool M.L Fick wil net baie dankie sê aan die gemeenskap”, het Meneer Michael sy dank uitgespreek. 'n Spesiale woord van dank gaan aan Specialized Property Maintenance, wat die hoofborg vir die dag was.
Een ding is vir seker, ons as die Potchefstroom gemeenskap sien alreeds uit na volgende jaar se gholfdag!
Johané van Dyk - Potchefstroom
___________________________________
Video: Menere Divan Visser en Michael Pietersen gesels met The Go-To Guy