Jou troudag is een van die belangrikste dae van jou lewe, maar dit kom met ‘n prys! Voordat jy begin droom oor watter blomme jy wil hê of watter koek jy gaan sny, moet jy een groot vraag beantwoord: Hoeveel kan ons bekostig? Troubeplanning begin altyd met die opstel van 'n begroting, en al klink dit dalk intimiderend, is dit die sleutel tot 'n suksesvolle dag.
Hier is ‘n gids om jou te help om ‘n realistiese en volhoubare begroting vir jou troue saam te stel, met praktiese wenke wat die proses makliker en minder stresvol kan maak.
Bepaal Jou Totale Begroting
Voordat jy en jou lewensmaat enige besluite neem, moet jy eers vasstel hoeveel geld jy tot jou beskikking het. Begin deur te kyk wat julle self kan bydra uit spaarrekeninge en toekomstige besparings. Dit is ook ‘n goeie idee om met julle ouers te gesels om uit te vind of hulle bereid is om by te dra, en hoeveel hulle moontlik kan gee.
Dit is belangrik om realisties te wees oor wat julle werklik kan bekostig. Die lewe raak duur, en jy wil nie hê dat jou troue jou toekomstige finansies in die gedrang bring nie.
Stel Prioriteite
Elke paartjie se prioriteite is anders. Jy mag dalk die meeste geld op jou droomrok wil spandeer, terwyl jou lewensmaat voel die kos moet uitstaande wees. Die sleutel is om saam te sit en te besluit watter elemente vir julle die belangrikste is.
Byvoorbeeld, as die venue en kos vir julle prioriteite is, kan jy dalk minder op dekor spandeer. Deur vooraf te besluit wat vir jou saak maak, kan jy jou begroting aanpas om seker te maak dat jy nie oor jou perke gaan nie.
Breek Jou Begroting Op in Kategorieë
Sodra jy jou totale begroting het, is dit tyd om dit in verskillende kategorieë op te breek. Hier is 'n gemiddelde begrotingverdeling wat jy kan gebruik om jou eie begroting te beplan:
Venue en Kos (40%): Hierdie is die grootste deel van jou begroting, aangesien dit die spyskaart, drankies, en natuurlik die huur van die venue insluit.
Fotograaf en Videograaf (12-15%): Troufoto’s en video's is 'n moet om jou spesiale dag vas te vang.
Musiek/Vermaak (10%): Of jy nou ‘n lewendige band of DJ wil hê, musiek is belangrik om jou gaste in die regte stemming te kry.
Blomme en Dekor (10%): Dit sluit alles in van blommerangskikkings tot tafeldekor.
Bruidsdrag en Skoonheid (5-10%): Jou trourok, skoene, grimering en hare moet in hierdie kategorie val.
Klein Goedjies (2-5%): Dit sluit geskenke vir die gaste, vervoerkostes, en kleiner besonderhede in.
Stel n begrotingsdokument op
‘n Excel-Spreadsheet of Google Sheets werk uitstekend om al jou uitgawes dop te hou. Skep kolomme vir elke kategorie en vul dit met jou verwagte uitgawes. Dit is belangrik om ook ‘n kolom in te sluit vir die werklike koste, want daar sal altyd 'n paar verrassings wees.
Maak seker jy sluit alle uitgawes in, soos bykomende fooie, belasting, en fooitjies vir verskaffers. Dit help om enige begrotingsinsinking te vermy.
Voeg 'n Buffer by
Dit is altyd slim om ‘n buffer van 7-10% by jou begroting te voeg vir enige onverwagte uitgawes. Dit kan dinge wees soos ekstra kos of verskaffers wat laas-minuut fooie vra. As jy ‘n buffer het, kan jy die spanning van onverwagses vermy en steeds op jou begroting bly.
Moenie Alles Dadelik Boek Nie
Dit is aanloklik om dadelik verskaffers te bespreek en trourokke te begin pas, maar vat ‘n bietjie tyd om oor jou opsies te dink. Voordat jy iets bespreek, moet jy ‘n duidelike idee hê van jou algehele visie vir die troue. Elke keuse wat jy maak, moet in lyn wees met jou begroting en die tema wat jy beplan.
Dink Aan Alternatiewe Opsies
As jy voel dat sekere elemente van jou troue te duur is, dink aan goedkoper alternatiewe. Byvoorbeeld, om op 'n weekdag te trou kan jou venue- en koskoste aansienlik verminder. Dit is ook nie nodig om alles splinternuut te koop nie – jy kan sekere items huur, of tweedehandse dekor koop.
Moenie Skuld Maak Nie
Dit is nooit ‘n goeie idee om skuld te maak vir jou troue nie. Hou by wat jy het, en moenie jou toekoms finansieel benadeel net om vir een dag te spandeer nie. Die beste troue is nie noodwendig die duurste een nie, maar die een wat julle geluk en liefde weerspieël.
Gastelys en Begroting
Jou gastelys speel 'n groot rol in jou begroting. Hoe meer mense jy nooi, hoe meer spandeer jy op kos, drankies, en sitplekke. Probeer om jou gastelys realisties te hou en vermy om mense te nooi net uit pligsgevoel. Elke ekstra persoon is ‘n ekstra koste.
Troubeplanning kan stresvol wees, maar as jy van die begin af ‘n stewige begroting opstel, sal dit die proses baie makliker maak. Dit gaan oor balans – jy wil seker maak jy geniet die beplanning sonder om finansieel oorweldig te voel. Hou jou begroting byderhand, maak slim besluite, en onthou, aan die einde van die dag gaan dit oor die viering van julle liefde, nie hoeveel jy spandeer nie!
