Vandag pak ons 'n onderwerp aan wat dalk nie so glansryk soos die troue self is nie, maar absoluut noodsaaklik vir die nuwe hoofstuk wat jy gaan begin – die verandering van jou van na die troue. Ja, ek praat oor daardie administratiewe hindernis wat wag nadat die laaste stukkie troukoek geniet is. In hierdie artikel gaan ek jou deur elke stap lei om seker te maak jy mis niks nie. Kom ons spring in!
Foto: The Go-To Guy Creations
Stap 1: Kies Jou Nuwe Van
Eerste dinge eerste, besluit op die van wat jy wil hê. Of jy nou jou eie van behou, jou lewensmaat se van aanneem, of 'n kombinasie van die twee kies, maak seker dit voel reg vir jou. Onthou, jy gaan hierdie van baie gebruik, so wees heeltemal seker van jou keuse!
Stap 2: Jou Huweliksertifikaat is Noodsaaklik
Jou huweliksertifikaat is die toegangskaartjie tot die veranderingsproses. Sonder dit, gaan jy nie ver kom nie. As jy binne Suid-Afrika trou, kan jy jou amptelike huweliksertifikaat by die Departement van Binnelandse Sake (DBS) kry. Maak seker jy kry die volledige weergawe, want dit bevat al die nodige inligting vir die pad vorentoe.
Stap 3: Tyd om Jou ID te Verander
Met jou huweliksertifikaat in die hand, is jou volgende stop die DBS om jou identiteitsdokument te verander. Hier sal jy aansoek doen vir 'n nuwe ID met jou nuwe van op. Wat gaan dit jou kos? Nie te veel nie, dink aan so R140, maar dubbelcheck die DBS se webwerf vir die nuutste inligting. Wees gereed vir 'n wagtydperk van ongeveer 6 tot 8 weke om jou nuwe ID in die hande te kry.
Stap 4: Moenie Jou Paspoort Vergeet Nie
Nadat jou ID uitgesorteer is, is dit tyd om jou nuwe paspoort te kry. Dieselfde prosedure geld: besoek die DBS, vul die nodige vorms in, en betaal die fooi, wat so rondom R400 is. Wees geduldig, want die wagtyd kan jou geduld toets, so moenie jou internasionale reisplanne te vinnig maak nie. As jy in Potchefstroom aansoek doen vir 'n nuwe paspoort kan ek uit persoonlike ervaring vir jou sê dat dit so tussen 'n week en twee weke vat om jou nuwe paspoort te ontvang.
Stap 5: Alles Anders
Nou dat jy 'n nuwe ID en paspoort het, is dit tyd om jou van op alles anders te verander. Dit sluit in bankrekeninge, bestuurslisensie, mediese fonds, werkrekords, versekeringspolisse, en enige ander amptelike dokumente. Dit is slim om 'n lys te maak van alles waar jou van verander moet word en dit een vir een af te merk.
'n Paar Handige Wenke
Maak 'n afspraak: Maak 'n afspraak by Binnelandse Sake op hulle webwerf, dit gaan jou ure se in die ry wag spaar.
Wees Geduldig: Die hele proses kan 'n rukkie neem, so moenie moed opgee nie.
Maak Genoeg Kopieë: Jy gaan baie gesertifiseerde kopieë van jou huweliksertifikaat en ID nodig hê, so maak seker jy het genoeg.
Hou 'n Lys: Hou 'n lys van al die plekke waar jy jou van verander het, net vir ingeval.
Vra Vir Hulp: Moenie bang wees om hulp te vra nie. Daar is baie mense wat deur hierdie proses gegaan het en waardevolle raad kan bied.
Om jou van te verander na jou troue is 'n belangrike stap in jou nuwe lewe saam met jou maat. Met 'n bietjie organisasie en baie geduld kan die proses redelik glad verloop. Onthou, aan die einde van hierdie administratiewe nagmerrie wag daar 'n nuwe begin. Sterkte met die vorms, en onthou, ek is hier om te help met enige vrae of net vir 'n bietjie morele ondersteuning.
